ބައެއް އެޕްތަކުން ޒާތީ މައުލޫމާތު ނަގާތީ ސަމާލުވާން އެފްބީއައިގެ އިންޒާރެއް

މިހާރު އެންމެ އާންމުކޮށް ބޭނުންކުރާ ބައެއް މޯބައިލް އެޕްލިކޭޝަންތައް މެދުވެރިކޮށް ޒާތީ މައުލޫމާތުތައް އެއްކޮށް، އެހެން ގައުމުތަކުގައި ރައްކާކުރަމުންދާކަމުގެ ބިރު އޮތުމުން އެފަދަ އެޕްތައް އިންސްޓޯލްކުރުމުގައި އައިފޯނާއި އެންޑްރޮއިޑް ބޭނުންކުރާ ފަރާތްތަކުން ސަމާލުވުމަށް އެމެރިކާގެ އެފްބީއައި އިން އިންޒާރުދީފިއެވެ.

އެފްބީއައި އިން ބުނާގޮތުގައި އެފަދަ އެޕެއް އަމިއްލައަށް ޑައުންލޯޑު ނުކުރާ މީހުންގެ މައުލޫމާތުވެސް މިގޮތަށް ވަގަށް ނެގުމުގެ ފުރުސަތު އެބައޮތެވެ.

އެގޮތުން، ރައްޓެއްސެއް ނުވަތަ އާއިލާ މީހަކު އެމީހެއްގެ ފޯނުގައިވާ ކޮންޓެކްޓް ލިސްޓަށް (އެޑްރެސް ބުކް) އެކްސެސްވުމުގެ ހުއްދަ އެޕަކަށް ދީފިނަމަ، އެ ލިސްޓުގައިވާ އެހެން މީހުންގެ ނަމާއި، އީމެއިލް އެޑްރެސް އަދި ފޯނު ނަންބަރު ފަދަ މައުލޫމާތުތައް ނަގައި، އެހެން ގައުމުތަކުގެ ސަރވަރުތަކުގައި ރައްކާކުރެވިދާނެއެވެ.

ޗައިނާއާ ގުޅުންހުރި ޓިކްޓޮކް އެޕާ މެދު އެތައް އަހަރެއް ވަންދެން ފާޅުކުރަމުންދިޔަ ކަންބޮޑުވުންތަކަށްފަހު އައި މި އިންޒާރުގައި އެފްބީއައި އިން ފާހަގަކޮށްފައިވަނީ، މިއީ ހަމައެކަނި އެއް ޕްލެޓްފޯމަކަށް އޮތް ބިރެއް ނޫން ކަމަށާއި، މިއީ ބޭރު ގައުމުތަކުގައި އުފައްދާފައިވާ ގިނަ އެޕްތަކަކާ ގުޅިފައިވާ މައްސަލައެއް ކަމަށެވެ. ޚާއްސަކޮށް ޗައިނާއާ ގުޅުންހުރި އެޕްތަކަށް ޕާމިޝަން ދިނުމާއެކު، އެޕް ބޭނުންކުރާ މީހުންނާއި ބޭނުންނުކުރާ މީހުންގެ މައުލޫމާތުވެސް ފުޅާ ދާއިރާއެއްގައި އެއްކުރެއެވެ.

އެފްބީއައި އިން ނެރުނު ބަޔާނުގައި ބުނެފައިވަނީ، ބައެއް އެޕްތަކަކީ އެޕް ބޭނުން ނުކުރާ ވަގުތުތަކުގައިވެސް ފޯނުގެ ބެކްގްރައުންޑުގައި މައުލޫމާތު އެއްކުރާ އެޕްތަކެއް ކަމަށެވެ. އަދި ބައެއް ހާލަތްތަކުގައި މި މައުލޫމާތުތައް ރައްކާކުރަނީ އެ ގައުމެއްގެ ސަރުކާރަށް އެ މައުލޫމާތުތައް ބެލޭގޮތަށް ގާނޫނުތައް ފަރުމާކޮށްފައި ހުންނަ ގައުމުތަކުގައެވެ.

އެފްބީއައި އިން ވަކި ކުންފުންޏެއްގެ ނަން ހާމަކޮށްފައި ނުވި ނަމަވެސް، މިއީ އެމެރިކާގައި އެންމެ ގިނައިން މީހުން ޑައުންލޯޑުކުރާ ޗައިނާގެ އެޕްތައް ކަމަށްވާ ވީޑިއޯ އެޑިޓްކުރާ އެޕް "ކެޕްކަޓް"، ވިޔަފާރިކުރާ އެޕްތައް ކަމަށްވާ "ޓެމޫ" އަދި "ޝީން"، އަދި ސޯޝަލް މީޑިއާ އެޕް "ލެމަން8" ފަދަ އެޕްތަކަށް ނިސްބަތްކޮށް ދީފައިވާ އިންޒާރެއް ކަމަށް ބެލެވެއެވެ.

އެމެރިކާގެ އޮފިޝަލުން އިންޒާރު ދެއްވާ ގޮތުގައި، ޗައިނާއާ ގުޅުންހުރި ޕްލެޓްފޯމްތަކުން އެއްކުރާ މައުލޫމާތު ބޭނުންކޮށްގެން އެމެރިކާ ރައްޔިތުންގެ ޒާތީ އަދި މަސައްކަތުގެ ނެޓްވޯކްތައް ދެނެގަނެ، ޖާސޫސީ މަސައްކަތްތަކަށް ބޭނުންކުރުމަކީ އެކަށީގެންވާ ކަމެކެވެ. ސަބަބަކީ ޗައިނާގައި އޮޕަރޭޓްކުރާ އެޕްތަކަކީ އެ ގައުމުގެ ގައުމީ ސަލާމަތާބެހޭ ގާނޫނުތަކުގެ ދަށުން، ސަރުކާރަށް ޔޫޒަރުންގެ މައުލޫމާތުތައް ދޭންޖެހޭ އެޕްތަކަކަށް ވާތީއެވެ.

އެޕަކުން އާދަޔާޚިލާފަށް މައުލޫމާތު އެއްކުރާކަން ދެނެގަނެވޭނެ ބައެއް ނިޝާންތައްވެސް އެފްބީއައި އިން ވަނީ ފާހަގަކޮށްފައެވެ. މީގެ ތެރޭގައި ފޯނުގެ ބެޓެރީ އަވަހަށް ހުސްވުމާއި، އިންޓަރނެޓް ޑޭޓާ ބޭނުންކުރާ މިންވަރު ކުއްލިއަކަށް އިތުރުވުމާއި، އެކައުންޓުގައި ޝައްކުކުރެވޭފަދަ ކަންތައްތަކެއް ހިނގުން ހިމެނެއެވެ.

މިކަމުން ރައްކާތެރިވުމަށް އެފްބީއައި އިން އިލްތިމާސްކުރަނީ، ބޭނުންނުވާ މައުލޫމާތުތައް ހިއްސާނުކުރުމަށާއި، ހަމައެކަނި ރަސްމީ އެޕް ސްޓޯރުތަކުން އެޕްތައް ޑައުންލޯޑު ކުރުމަށާއި، އެޕްތަކަށް ދީފައިވާ ޕާމިޝަންތައް ގަވާއިދުން ޗެކްކުރުމަށެވެ. އަދި އެހެނިހެން ތާރޑް-ޕާޓީ ވެބްސައިޓުތަކުން ޑައުންލޯޑުކުރާ އެޕްތަކުގައި މެލްވެއަރ އެކުލެވިގެންވުމުގެ ނުރައްކާ ބޮޑުކަމަށްވެސް ވަނީ ބުނެފައެވެ.

ޓިކްޓޮކްއާ މެދު އުފެދުނު ބޮޑެތި ކަންބޮޑުވުންތަކަށްފަހު، އެމެރިކާގެ ގައުމީ ސަލާމަތަށްޓަކައި 2026 ވަނަ އަހަރު ވެވުނު އެއްބަސްވުމެއްގެ ދަށުން ޓިކްޓޮކްގެ ޕޭރެންޓް ކުންފުނި (ބައިޓްޑާންސް) އަށް ވަނީ އެމެރިކާގެ އޮޕަރޭޝަންތަކުގެ ކޮންޓްރޯލް އެމެރިކާގެ ގްރޫޕަކަށް ދޫކޮށްލަން މަޖުބޫރުކޮށްފައެވެ. އެފްބީއައިގެ މި އިންޒާރުން ދައްކައިދެނީ މި ނުރައްކަލަކީ ހަމައެކަނި ޓިކްޓޮކްގެ އިތުރުންވެސް އެމެރިކާގެ އެތައް މިލިއަން ބަޔަކު ބޭނުންކުރާ ބޭރުގެ އެހެން އެޕްތަކުގައިވެސް އޮތް ނުރައްކަލެއް ކަމެވެ.