އޭއައި އަށް ހުރިހާ މައުލޫމާތެއް ހިއްސާކުރުމުގެ ނުރައްކާ!

އާޓިފިޝަލް އިންޓެލިޖެންސް (އޭއައި) ޓެކްނޮލޮޖީއަކީ މިއަދު އަޅުގަނޑުމެންގެ ދިރިއުޅުމުގެ ކޮންމެ ކަމަކަށް ވެސް ފަސޭހަކަން ގެނެސްދެމުން އަންނަ ވަސީލަތެކެވެ. މަސައްކަތްތައް އަވަސްކުރުމަށާއި، މައުލޫމާތު ހޯދުމަށް ގިނަ ބަޔަކު އޭއައި ޗެޓްބޮޓްތަކުގެ އެހީތެރިކަން ހޯދަމުންދާއިރު، އެ ވަސީލަތްތަކާ ހިއްސާކުރެވެނީ ކިހާ ވަރެއްގެ ޒާތީ އަދި ސިއްރު މައުލޫމާތުތަކެއްކަމާމެދު ވިސްނާލެވެނީ ވަރަށް މަދު ފަހަރަކުއެވެ. އަމިއްލަ ސިއްރު ވިސްނުންތަކާއި، ކަންބޮޑުވުންތަކުގެ އިތުރުން ޒާތީ އެތައް މައުލޫމާތެއް އޭއައި އަށް ހާމަކުރުމަކީ ހީވެސް ނުކުރާ ފަދަ ނުރައްކާތަކަކާ ކުރިމަތިލާންޖެހިދާނެ ކަމެކެވެ. މިއީ އެފަދަ ހާދިސާތަކުން އިބުރަތް ހާސިލްކޮށް، އޭއައި ބޭނުންކުރުމުގައި މިހާރަށްވުރެ ބޮޑަށް ހޭލުންތެރިވާންވީ ވަގުތެވެ.

އޮސްޓްރިއާގެ ވިއެނާއިން ފެށިގެން އާޖެންޓީނާގެ ބުއެނޮސް އައިރީސްއާ ހަމައަށް ފިލައިގެން އުޅުނު އިސްރާއީލުގެ ދެމަފިރިން ކަމަށްވާ މާލީ އަދި ލިއެލް ޔަހަލޯމީ ހޯދާފައިވަނީ އެމީހުން އާޓިފިޝަލް އިންޓެލިޖެންސް (އޭއައި) މޮޑެލްތަކާ ދައްކާފައިވާ ޗެޓް ހިސްޓްރީ ބޭނުންކޮށްގެން ކަމަށް ރިޕޯޓްތަކުން ވަނީ ހާމަވެފައެވެ. މި ހާދިސާއަކީ މީހުން އޭއައި ބޭނުންކުރާ ގޮތާމެދު އަލުން ވިސްނަންޖެހިފައިވާ ކަމުގެ ވަރުގަދަ މިސާލެއް ކަމަށް ސައިބާ ސެކިއުރިޓީ މާހިރުން ބުނެއެވެ.

ސައިބާ ސްޕެޝަލިސްޓެއް އަދި 'ޔޯ ސެކިއޯ' ގެ ބާނީ އޮޝާ ކޯހެން ފާހަގަކުރާ ގޮތުގައި، ގިނަ މީހުން އޭއައި ޗެޓްބޮޓްތައް އާދައިގެ ސާޗް ބާ އެއްގެ ގޮތުގައި ދުށް ނަމަވެސް، އެއަށް ހިއްސާކުރެވެނީ މާ ގިނަ ޒާތީ އަދި ތަފްސީލީ މައުލޫމާތުތަކެކެވެ. އާދައިގެ ގޮތަކަށް ސާޗް އިންޖީނެއްގައި މައުލޫމާތު ހޯދާއިރު ޓައިޕްކުރަނީ ކުރު ބަސްތަކެއް ކަމުގައި ވިޔަސް، އޭއައިއާ ވާހަކަދައްކާއިރު މީހުން އެމީހުންގެ ހާލަތާއި، ސިއްރު ވިސްނުންތަކާއި، ކަންބޮޑުވުންތައް ފަދަ އެހެން އިންސާނަކާ ހިއްސާނުކުރާނެ ފަދަ ވާހަކަތައް ވެސް ލިޔެއެވެ. މީގެ ސަބަބުން ސާޗް ހިސްޓްރީއަށް ވުރެ އޭއައި ޗެޓްތަކުން މީހާގެ ޒާތީ ވިސްނުމާއި ރޭވުންތައް މާ ފުޅާކޮށް ހާމަވެގެންދެއެވެ.

މީހުން އޭއައި ޗެޓްބޮޓްތަކާ ވާހަކަދައްކަނީ އަމިއްލަ ނަފްސާ ވާހަކަދައްކާ ފަދަ ސިއްރު މާހައުލެއްގައޭ ހީވި ނަމަވެސް، ހަގީގަތުގައި އެއީ ކްލައުޑް ޚިދުމަތެކެވެ. މި ޚިދުމަތްތައް ހުންނަނީ އެކައުންޓްތަކާއި، ބޭނުންކުރާ ޑިވައިސް، އީމެއިލް، ބްރައުޒާ، އައިޕީ އެޑްރެސް އަދި އެ ކުންފުނިތަކުގެ ޑޭޓާ ރައްކާކުރުމުގެ ސިޔާސަތުތަކާ ގުޅިފައެވެ. އަދި ސާޗް ބާގެ ތެރެއަށް އޭއައި ލައިފައި ހުރި ނަމަވެސް، އެ ދައްކާ ވާހަކަތައް ގެއްލިގެން ނުދާ ކަމަށާއި އެއީ ކުންފުނިތަކުގެ ސާވަރުތަކުގައި ރައްކާކުރެވޭ މައުލޫމާތު ކަމަށް ވިސްނަން ޖެހެއެވެ.

އޭއައި މޮޑެލްތައް ތަމްރީނުކުރުމުގައި ޑޭޓާ ބޭނުންކުރާ ގޮތް

ގިނަ އޭއައި ކުންފުނިތަކުން ޔޫޒަރުން އެ ޓޫލްތަކަށް ލިޔާ މައުލޫމާތުތައް ބޭނުންކުރަނީ އެމީހުންގެ ސިސްޓަމްތަކާއި މޮޑެލްތައް އިތުރަށް ތަމްރީނުކޮށް (ޓްރެއިންކޮށް) ތަރައްގީކުރުމަށެވެ. މީގެ މާނައަކީ، ހިއްސާކުރެވޭ ޒާތީ ވާހަކައެއް ނުވަތަ ވިޔަފާރިއެއްގެ ސިއްރު މައުލޫމާތެއް، މުސްތަގުބަލުގައި އެހެން މީހަކު ކުރާ ސުވާލެއްގެ ޖަވާބުގައި އޭއައި މޮޑެލްގެ ފަރާތުން ބޭރުވެގެން ދިޔުމުގެ ފުރުސަތު އޮތުމެވެ. އެހެންކަމުން، މޮޑެލް ޓްރެއިނިންގަށް ޑޭޓާ ބޭނުންކުރުން ހުއްޓުވުމަށްޓަކައި ދީފައިވާ "ޑޭޓާ އޮޕްޓް-އައުޓް" ފީޗާތައް ބޭނުންކުރުމަކީ މުހިންމު ފިޔަވަޅެކެވެ.

ތިންވަނަ ފަރާތްތަކަށް މައުލޫމާތު ހާމަވުމުގެ ބިރު

އޭއައި ޗެޓްބޮޓްތަކަކީ އޮންލައިން ކްލައުޑް ޚިދުމަތްތަކަކަށް ވާތީ، މި ޕްލެޓްފޯމްތަކަކީ ވެސް ސައިބާ ހަމަލާތަކާއި ހެކަރުންގެ ނުރައްކާ އޮތް ވަސީލަތްތަކެކެވެ. ސާވަރަކަށް ޑޭޓާ ބްރީޗެއް ނުވަތަ ހަމަލާއެއް އަރައިފިނަމަ، ރައްކާކޮށްފައި ހުރި އެތައް މިލިއަން ބައެއްގެ ޗެޓް ހިސްޓްރީއާއި ޒާތީ ދިރިއުޅުމުގެ ސިއްރުތައް އާންމުވުމުގެ ފުރުސަތު ބޮޑެވެ. މީގެ އިތުރުން، ގާނޫނީ ތަހުގީގުތަކުގައްޔާއި ކޯޓު އަމުރުތަކުގެ ދަށުން މި ކުންފުނިތަކަށް ޗެޓް ހިސްޓްރީ ތަންފީޒީ އިދާރާތަކަށް ހަވާލުކުރަން މަޖުބޫރުވެއެވެ.

އޮފީސްތަކާއި ވިޔަފާރިތަކުގެ ސިއްރު ހިފެހެއްޓުން

ކުންފުނިތަކުގެ މުވައްޒަފުން ކޯޑު ޗެކްކުރުމަށާއި، ރިޕޯޓް ޑްރާފްޓްކުރުމަށް ނުވަތަ ކަސްޓަމަރުންގެ މައުލޫމާތު ދިރާސާކުރުމަށް އާންމު އޭއައި ޓޫލްތައް ބޭނުންކުރުމަކީ ވިޔަފާރީގެ ބޮޑެތި ސިއްރުތައް ލީކުވާން މެދުވެރިވާ މައިގަނޑު އެއް ސަބަބެވެ. އެހެންކަމުން، އޮފީސް މާހައުލުގައި އޭއައި ބޭނުންކުރަންވާނީ ޑޭޓާގެ ރައްކާތެރިކަން ކަށަވަރުކޮށްދޭ އެންޓަޕްރައިޒް ވާޝަންތަކާއި، ކުންފުނީގެ ސިއްރު ހިފެހެއްޓުމުގެ ހަރުދަނާ އުސޫލުތަކާ އެކުގައެވެ.

މިކަމުން ސަލާމަތްވާނީ ކިހިނެތް؟

އޭއައި ބޭނުންކުރުމުގައި ވީޕީއެން ފަދަ ޓެކްނިކަލް ވަސީލަތްތަކަށް ވުރެ މުހިންމީ އަމިއްލަ އާދަކާދައާއި އަމަލުތައް ބެހެއްޓޭ ގޮތެވެ. އެހެންކަމުން ޕާސްވޯޑާއި، ވެރިފިކޭޝަން ކޯޑުތަކާއި، ކްރެޑިޓް ކާޑު ތަފްސީލުތަކުގެ އިތުރުން ޒާތީ އަދި ސިއްރު މެޑިކަލް، ލީގަލް، ނުވަތަ ވިޔަފާރީގެ ލިޔެކިޔުންތައް އޭއައި ޓޫލްތަކަށް އަޅައިގެން ނުވާނެއެވެ.

މިފަދަ ނުރައްކާތަކުން ސަލާމަތްވުމަށްޓަކައި ޕްރައިވެސީ ސެޓިންގްސް ބަލައި ދަސްކުރުމާއި، ބޭނުން ނެތް ހާލަތްތަކުގައި ޗެޓް ހިސްޓްރީ ޑިލީޓްކުރުމާއި، ޓެމްޕަރަރީ ނުވަތަ އިންކޮގްނިޓޯ މޯޑުތައް ބޭނުންކުރުން މުހިންމެވެ. މީގެ އިތުރުން ވިޔަފާރިތަކާއި އޮފީސްތަކުގައި މުވައްޒަފުން އޭއައިއަށް އަޅަންވާނެ އަދި ނާޅަންވާނެ މައުލޫމާތުތައް ބަޔާންކުރާ އުސޫލުތައް އެކުލަވާލަންޖެހެއެވެ. އޭއައި އަކީ މުހިންމު ވަސީލަތެއް ނަމަވެސް އެއީ ސިއްރު ރައްކާކުރާ ތަޅުލާފައި ހުންނަ ތިޖޫރިއެއް ނޫންކަން ދަނެ، ޓައިޕްކުރުމުގެ ކުރިން ވިސްނާލުމަކީ އެންމެ މުހިންމު ފިޔަވަޅެވެ.